Украинската војска ги повика мајките на руските војници заробени на украинска територија да дојдат по нив, наведуајќи дека десетици војници се заробени од почетокот на руската инвазија.
– „Донесовме одлука да се предадат заробените руски војници на нивните мајки, доколку тие дојдат по нив во Киев“, се наведува во соопштението на украинското министерство за одбрана.
Министерството објави и броеви на телефони и меил адреси преку кои мајките можат да добијат информации за своите синови затворени во Украина. Доколку се потврди дека нивниот син е заробен, мајките се повикани да дојдат во Полска, а потоа да влезат во Украина.
– „Ќе бидете дочекани и испратени до Киев каде што ќе ви бидат предадени вашите синови“ наведува украинското министерство, додавајќи дека за разлика од „фашистите на Путин“, тие не водат „војна против мајките и нивните заробени деца“.
За време на воените судири меѓу Москва и чеченските сепаратисти во 1990-тите години, бројни млади руски регрути биле испратени на фронтот, а дел од нив биле заробени. Тогаш мајките на војниците се мобилизирале да ги вратат своите синови или нивните тела, одејќи на лице место, а тоа движење ги поттикнало антивоените протести во Русија, пренесува Франс прес.
