Соопштение за јавност од СДСМ
Градоначалничката на Град Скопје Данела Арсовска веќе втор месец од мандатот не работи ништо, нема реализирано ниту еден проект во интерес на скопјани.
Но, затоа разрешува директори, поништува огласи за вработувања и прекинува проекти кои се во интерес на граѓаните и градот.
Скандалозен е прекинот на проектот за ефикасен и еколошки транспорт, познат како Бас Рапид Транзит, кој се споведуваше со поддршка од ЕБОР, вреден 70 милиони евра.
Целосно невистинити и контрадикторни се оправдувањата кои ги даваат Арсовска и Град Скопје дека на тој начин ќе се загрозела животната средина.
БРТ проектот е систем кој важи за еден од најеколошките начини на јавен превоз. Според проектот, освен што возилата возат на еколошки погон, за двете траси беше обезбедено двојно повеќе зеленило. Предвидени беа и дополнителни 200.000 евра за соодветно пресадување на дрвја каде што е потребно за да не се загрози ниту едно зеленило.
Неговата ефикасност ќе го намалеше обемот на сообраќај, што ќе резултираше со намалување на штетните гасови во воздухот.
Втората лага е дека со овој проект се загрозува системот за водоснабдување. Напротив, проектот предвидуваше целосна заштита на цевките за вода што минуваат под трасите на движење на БРТ, со соодветни механизми за заштита.
Наместо да се служи со невистинити оправдувања, Арсовска треба да ја преиспита одлуката, бидејќи укинувањето на проектот е на штета на граѓаните и на Градот.
Истовремено, со нејзината одлука се урива угледот на Скопје и државата пред меѓународните финансиски институции.
Данела Арсовска во континуитет докажува дека не се води од интересите на граѓаните, туку од свои лични и партиски интереси.
