Делови од водопадите на Нијагара, на границата САД-Канада, замрзнаа вчера откако температурите паднаа на -18С на реката Нијагара минатата недела, а студените бранови сè уште се присутни во американската држава Њујорк и другите делови на Северна Америка, наведува „Independent“.
Британскиот весник наведува дека туристите кои вчера се нашле на водопадите Нијагара можеле да видат и фотографираат големи парчиња мраз како пловат во водата, додека облаци од пареа и виножито биле присутни во текот на целиот ден.
„Independent“ пишува дека иако на некои фотографии се чини дека водопадите се целосно замрзнати, водата никогаш не престанува да тече и покрај ваквите услови, а присуството на големи мразови на водопадот е забележано во текот на 2014 и 2015 година кога поларните циклони го погодиле тоа подрачје .
Заедно со многу други сојузни држави низ Соединетите држави во текот на изминатите две недели, Њујорк исто така беше погоден од силни студени бранови, а во Нијагара се очекуваат повеќе снежни врнежи во текот на следните неколку дена, според британскиот весник.