Нетфликс официјално почна да се бори со претплатниците ширум светот кои бесплатно ги споделуваат своите сметки со луѓе со кои не живеат во исто домаќинство. Пријателите, членовите на семејството, па дури и поранешните партнери кои со години ја користеле истата сметка на Нетфликс, сега ќе мора да платат доколку сакаат да продолжат да ја користат услугата.
Нетфликс го објави своето „Ажурирање за споделување“ вчера попладне заедно со е-пошта што ќе биде испратена до сопствениците на сметките кои ја споделуваат својата лозинка за Нетфликс со луѓе надвор од нивното домаќинство.
„Почнувајќи од денес, ќе ја испраќаме оваа е-пошта до членовите кои споделуваат Нетфликс надвор од нивното домаќинство во Соединетите Држави“, објави компанијата. Само неколку часа подоцна, објавата беше проширена на корисници во 103 земји.
„Сметката на Нетфликс е за употреба во едно домаќинство“, посочува компанијата во е-поштата потпишана од „тимот на Нетфликс“.
„Секој што живее во исто домаќинство може да користи иста сметка на Нетфликс дома, во движење и на одмор“, објаснуваат од компанијата. Оние кои не можат да го користат се луѓе кои не живеат во исто домаќинство. Нетфликс им нуди две опции. Сопственикот на сметката може да плаќа дополнителни 7,99 долари месечно за лице кое не е член на нивното домаќинство или тоа лице може да се регистрира за сопствено членство на Нетфликс и да го пренесе својот профил на новата сметка. Оние кои ќе го префрлат својот Нетфликс-профил на нова сметка ќе ја задржат својата историја на гледање и препораки.
Сопствениците на сметки кои не се сигурни дали некој надвор од домот ја користел нивната сметка на Нетфликс може да ги проверат „поставките“ за да ги видат сите уреди најавени на сметката.
Нетфликс, кој минатата година се бореше со загуба на профит, тогаш најави дека ќе започне со ограничување на споделувањето лозинки. Компанијата соопшти дека има за цел да ги надомести загубите што произлегуваат од долгогодишната практика на споделување сметки со околу 100 милиони различни домаќинства.
