Претседателот на Владата на Република Северна Македонија, Димитар Ковачевски, денеска заедно со директорот на Дирекцијата за технолошки индустриски развојни зони, Јован Деспотовски во технолошко-индустриската развојна зона Штип присуствуваше и се обрати на означувањето на почетокот на градежните работи на нова фабрика, инвестиција на „Магна Мехатроникс“, која произведува интегрирани системи од механички и електронски компоненти и е една од групациите на канадската компанија „Магна Интернационал“.
„Магна Интернационал“ е една од најреномираните светски компании, која е специјализирана да дизајнира, развива и произведува автомобилски системи, модули и компоненти кои се испорачуваат на сите позначајни производители на автомобили во светот. Се работи за проширување на опсегот на работа на компанијата со нов инвестициски проект, покрај фабриката на компанијата во ТИРЗ Струга.https://www.youtube.com/embed/BQG2N-PBP1I
„Оваа инвестиција ја надополнува листата на најзначајни големи инвестиции од светски реномирани компании, кои ја одбираат токму нашата држава како нивна инвеститорска дестинација. Ова е јасен сигнал дека Северна Македонија нуди поволен и предвидлив деловен амбиент за компаниите, за нови инвестиции. Тоа е резултат на нашите стратешки политики, како што е членството во НАТО, како и почетокот на преговорите со Европската Унија. Доаѓањето на странски познати компании кај нас значи повисок инвеститорски рејтинг, отворање на нови и подобро платени работни места, а за нашите граѓани повисоки плати и можности за докажување на стручноста и умешноста на светските пазари. Технолошко-индустриските развојни зони се моторот на нашата економија, а компаниите како „Магна Мехатроникс“ се компании коишто го зголемуваат не само бројот на работни места во државата, не само БДП, туку и меѓународното реноме на нашата држава“, рече премиерот Ковачевски, во своето обраќање пред присутните на настанот.
Спомнувајќи ги последните значајни инвестиции меѓу кои се оние на „Герејсхајмер“ и „Јагео“, премиерот Ковачевски ги потенцираше резултатите постигнати во технолошко-индустриските развојни зони.
„Бројот на вработени во технолошки-индустриските развојни зони во април годинава повторно бележи раст и достигна 16.700, што е за 15% повеќе од април 2022 година, односно 20% повеќе од 2021 година. Продолжува и растот на извозот кој заклучно со април достигна 1.2 милијарди евра. Само во април, компаниите во ТИРЗ реализирале извоз од 277 милиони евра што е за 12% споредено со април минатата година. Бележиме и пораст на приливите во Буџетот, каде компаниите во зоните, уплатиле 35% повеќе средства во Буџетот на државата во 2022 година споредено со 2021 година. Односно за едно евро исплатено од државата, компаниите назад во буџетот враќаат најмалку четири евра. За Северна Македонија како успешна приказна, ќе се слуша сè повеќе и повеќе! Одиме напред и само напред, со нови успеси, со нови инвестиции, отвораме нови работни места и ја развиваме домашната економија“, нагласи премиерот Ковачевски на настанот.
Директорот на Дирекцијата за технолошки индустриски развојни зони, Јован Деспотовски нагласи дека е задоволство по една година преговори да се присуствува на камен темелник за новата фабрика на „Магна Мехатроникс“.
„Со оваа инвестиција обезбедуваме право на пристоен живот за најмалку 600 наши сограѓани од овој регион со плати 20% над државниот просек. Ова е пример и вистински модел на соработка на одговорни политичари и институции преку кои покажуваме дека може да испорачаме конкретни резултати за граѓаните. Изразувам благодарност на премиерот Ковачевски за несебичната поддршка од почеток на преговорите и што подметна грб во клучни моменти за процесот да се движи побрзо“, изјави директорот на Дирекцијата за технолошки индустриски развојни зони, Јован Деспотовски, изразувајќи благодарност и до тимот на ТИРЗ и до градоначалникот на Штип, Иван Јорданов за поддршката на проектот.
„Нашата втора постројка во Северна Македонија претставува уште една одредница на нашето патување кон проширување на нашата работа и способности во регионот, како и поддршка на нашите клиенти со иновативни производи од светска класа. Благодарни сме за поддршката што ни ја дава Владата и остануваме посветени на истражување дополнителни можности за раст“, рече потпретседателот на компанијата „Магна Интернационал“, Дејвид Креспи во своето обраќање на настанот.
Обраќање на премиерот Димитар Ковачевски на отпочнувањето на втората инвестиција на „Магна“ во Штип
Претседателот на Владата на Република Северна Македонија, Димитар Ковачевски денеска присуствуваше и се обрати на настан по повод почеток на градежни работи на инвестициски проект на компанијата „Магна Мехатроникс“, во технолошко-индустриската развојна зона Штип, која е една од групациите на една од најреномираните светски компании „Магна Интернационал“, специјализирана да дизајнира, развива и произведува автомобилски системи, модули и компоненти кои се испорачуваат досите позначајни производители на автомобили во светот. Се работи за проширување на опсегот на работа на компанијата со нов инвестициски проект, покрај фабриката во ТИРЗ Струга.
Во продолжение ви го пренесуваме интегралното обраќање на премиерот Ковачевски:
„Мојата, и целта на Владата е Северна Македонија да прерасне во една од најатрактивните инвестициски дестинации во Европа. И полека, но сигурно, ја остваруваме оваа цел. Доказ дека имаме поволна бизнис клима за привлекување на нови странски инвестиции и за развој на постоечките странски инвестиции, е токму денешниот настан.
Ми преставува задоволство, што денеска овде во Технолошко индустриската развојна зона во Штип, ја најавувам втората инвестиција на една од најуспешните светски компании, канадската компанија Магна Интернационал.
Во оваа прилика, упатувам честитки до г-динот Креспи, за довербата и за Вашиот потег, што по отворањето на фабриката Магна Мирор во ТИРЗ Струга, одлучивте да го проширите опсегот на работа, со нова инвестиција во ТИРЗ Штип, односно Магна Мехатроникс.
Оваа компанија, со седиште во Онтарио, е специјализирана за дизајн, развивање и произведување автомобилски системи, модули и компоненти коишто се испорачуваат на сите најзначајни производители на автомобили во светот.
Станува збор за една од најголемите компании производители во автомобилскиот свет, со 65 годишно искуство, којашто се протега во 29 држави со преку 341 производствена операција и 88 центри за развој, инженеринг и продажба со вкупно 171.000 вработени во рамки на компанијата.
Почитувани присутни и пред сè почитувани домаќини,
Оваа инвестиција ја надополнува листата на најзначајни големи инвестиции од светски реномирани компании, кои ја одбираат токму нашата држава како нивна инвеститорска дестинација. Ова е јасен сигнал, дека Северна Македонија нуди поволен и предвидлив деловен амбиент за компаниите, за нови инвестиции.
Тоа е резултат на нашите стратешки политики, како што е членството во НАТО, како и почетокот на преговорите со Европската Унија.
Во изминатите месеци, почнаа да се реализираат и две други големи инвестиции. Едната на германскиот фармацевтски гигант „Герејсхајмер“, вредна над 126 милиони евра, што претставува рекорден износ на инвестиција од основањето на технолошки индустриските развојни зони. Втората, на еден од најголемите производители на чипови за автомобилската индустријата, за авио индустријата, медицинската индустрија и 5Г технологиите – Јагео. Компанијата Јагео, одлучи да инвестира 205 милиони евра во нашата држава, каде ќе работат речиси 4.000 вработени, инвестиција за која се сметаше дека е незамисливо да се произведуваат такви нешта кај нас.
Доаѓањето на странски познати компании кај нас, значи повисок инвеститорски рејтинг, отворање на нови и подобро платени работниместа, а за нашите граѓани повисоки плати и можности за докажување на стручноста и умешноста на светските пазари. Технолошко-индустриските развојни зони, се моторот на нашата економија а компаниите како Магна Мехатроникс се компании коишто го зголемуваат не само бројот на работни места во државата, не само БДП туку и меѓународното реноме на нашата држава. Оваа компанија доколку прочитавте за нејзината историја и она што го работи, се работи за компанија којашто произведува сè што е потребно за автомобилската индустрија и не постои дел којшто во нивните фабрики не може да биде произведен.
Со заедничкиот концепт на Владата и на ТИРЗ, и во време на глобални предизвици, постигнавме договори од над 850 милиони евра инвестиции, што е речиси две третини од вкупниот обем на донесени инвестиции во претходните десет години.
Бројот на вработени во технолошки индустриските развојни зони во април годинава повторно бележи раст и достигна 16.700, што е за 15% повеќе од април 2022 година, односно 20% повеќе од 2021 година.
Продолжува и растот на извозот кој заклучно со април достигна 1.230 милијарди евра. Само во април, компаниите во ТИРЗ реализирале извоз од 277 милиони евра што е за 12% споредено со април минатата година.
Бележиме и пораст на приливите во буџетот, каде компаниите во зоните, уплатиле 35% повеќе средства во Буџетот на државата во 2022 година споредено со 2021 година. Односно за едно евро исплатено од државата, компаниите назад во буџетот враќаат најмалку четири евра.
За Северна Македонија како успешна приказна, ќе се слуша сè повеќе и повеќе! Одиме напред и само напред, со нови успеси, со нови инвестиции, отвораме нови работни места и ја развиваме домашната економија!
Сакам да се заблагодарам за вниманието, пред сè за поканата и посакувам големи успеси во реализацијата на вашата инвестиција во нашата држава“.
