Посебни објекти за бомбардерите ќе бидат поставени во оддалечената база на кралските австралиски воздухопловни сили Тиндал, на околу 300 километри јужно од Дарвин, главниот град на северната територија на Австралија, рекол изворот, кој сакал да остане анонимен бидејќи не бил овластен да зборува јавно за ова прашање.
Ова првпат е објавено од програмата Four Corners на националната телевизија на австралиската радиодифузија, повикувајќи се на американски документи. Премиерот Ентони Албанес рече дека Австралија „одвреме-навреме“ работи со Соединетите Држави на одбранбените сојузи.
„Се разбира, има посети на Австралија, вклучувајќи го и Дарвин, каде што американските маринци се стационирани на ротирачка основа“, рече Албанезе на прес-конференција
Северната територија на Австралија веќе е домаќин на чести воени соработки со САД. Илјадници американски маринци годишно ротираат низ областа за обука и заеднички вежби кои започнаа под претседателството на Барак Обама.
Кабинетот на австралискиот министер за одбрана Ричард Марлс одбил да го коментира случајот.
Запрашан за тоа на редовен брифинг, портпаролот на кинеското Министерство за надворешни работи Жао Лиџијан денеска изјави дека одбранбената и безбедносната соработка меѓу земјите не треба да биде насочена кон трети страни.
„Релевантните практики на американската страна ги зголемија тензиите во регионот, сериозно го поткопаа регионалниот мир и стабилност и може да предизвикаат трка во вооружување во регионот“, рече Жао.
„Кина ги повикува релевантните страни да го напуштат стариот менталитет на Студената војна и тесните геополитички концепти, како и да направат повеќе за да придонесат за регионалниот мир и стабилност и да ја зајакнат меѓусебната доверба“, нагласи тој.
Соединетите Американски Држави подготвија детални планови за „објект за операции на ескадрила“ што ќе се користи за време на сушната сезона на Северната територија – поврзан центар за одржување и паркинг простор за бомбардери Б-52, според извештајот на ABC.
Способноста да се распоредат бомбардери со долг дострел во Австралија испраќа силна порака до противниците за способноста на Вашингтон да проектира воздушна моќ, се вели во извештајот на американското воено воздухопловство.
САД, Велика Британија и Австралија склучија договор за безбедност минатата година за да ѝ обезбедат на Австралија технологија за распоредување подморници на нуклеарен погон, што ја налути Кина.
Поставувањето на бомбардери Б-52, кои имаат борбен дострел од околу 14.000 километри, во Австралија ќе послужи како предупредување за Пекинг бидејќи расте стравот од напад на Тајван, изјави за ABC Бека Васер од Центарот за американска безбедност со седиште во Вашингтон. .
Оваа година, САД распоредија четири бомбардери Б-52 во својата воздухопловна база Андерсен во Гуам, американска островска територија во западниот Пацифик.
