Францускиот претседател Емануел Макрон во телефонски разговор со Владимир Путин изразил загриженост за ситуацијата во нуклеарната централа Запорожје.
Ова по разговорот го соопштија од Елисејската палата и додадоа дека двајцата лидери повторно ќе разговараат за ова прашање за неколку дена.
„Претседателот на Франција уште еднаш изрази загриженост за ризиците со кои е оптоварена ситуацијата во нуклеарната централа Запорожје и ја нагласи потребата што поскоро да се испрати мисија од експерти на МААЕ во централата“, се вели во соопштението.
Во соопштението се наведува дека претседателите ќе разговараат за ова прашање (мисијата на МААЕ во Запорожје) во наредните денови по консултација со експерти.
Се додава дека руската страна се согласува со предлогот за мисијата на МААЕ.
Разговорот се водел на иницијатива на Макрон. Францускиот претседател моментално се одмара во својата летна резиденција Форт Бреганкон (департман Вар) на југот на Франција.
Тоа беше прв разговор меѓу двајцата лидери од 28 мај, кога имаа тринасочен телефонски разговор со германскиот канцелар Олаф Шолц.
Претходниот билатерален разговор меѓу Путин и Макрон се одржа на 3 мај, кога рускиот лидер му ја честиташе победата на Макрон на изборите во април.
Оваа година Макрон имаше неколку телефонски разговори со Путин.
Нивното вкупно времетраење, според францускиот лидер, надминало 100 часа.
