„Фактот дека нема кратенки за Украина на нејзиниот пат кон Европската унија е императив на правичност кон шесте земји од Западен Балкан кои со години сакаат да се приклучат на европскиот блок“, им рече канцеларот на пратениците во Бундестагот.
Тој потсети дека шест земји од Западен Балкан со години спроведуваат реформи и додаде дека „почитувањето на нашите обврски кон тие земји не е само прашање на кредибилитет“.
„Се работи за нашата сопствена безбедност што не може да се постигне без европски и стабилен Западен Балкан“, истакна тој.
Украинскиот министер за надворешни работи Дмитро Кулеба напиша на Твитер дека ги „навредува“ Украинците затоа што ги третираат како „граѓани од втор ред“.
„Стратешката нејасност кон европската перспектива на Украина, промовирана од некои европски престолнини во последниве години, не успеа и мора да заврши“, напиша тој.
Францускиот претседател Емануел Макрон, исто така, неодамна рече дека ќе бидат потребни „децении“ за кандидат како Украина да се приклучи на Европската унија и повика на поширок политички клуб надвор од европскиот блок на кој може да се приклучи и Британија.
Шолц верува дека Макрон е во право кога вели дека процесот на пристапување не е прашање на неколку месеци или години и смета дека најважно сега е „да се фокусираме на брза и прагматична поддршка за Украина“.
