Студијата вели дека голем број луѓе ќе умрат поради ниската стапка на вакцинирани постари жители на Кина, пишува The Guardian.
Кинеската влада е цврста во својата политика за нулта стапка на ковид, па затоа масовното тестирање и надзор над граѓаните продолжува. Се спроведуваат мерки за изолација и строг карантин, а минатата недела кинескиот претседател Си Џинпинг рече дека политиката на нулта ковид не треба да се доведува во прашање.
Властите во Кина остануваат посветени на борбата против омикрон, рече претседателот.
Резултатите од студијата на Универзитетот во Шангај велат дека укинувањето на политиката за нулта ковид ќе резултира со 112 милиони позитивни случаи без симптоми, пет милиони хоспитализации и 1,55 милиони смртни случаи.
„Веруваме дека нивото на имунитет стекнато со вакцинација за време на кампањата за вакцинација во март нема да биде доволно за да се спречат инфекциите со омикрон. Тоа би резултирало со преоптоварен здравствен систем и поголема побарувачка за кревети во единиците за интензивна нега. Побарувачката би била поголема од постојните капацитети на болниците“, пишува во истражувањето.
Пишува и дека вакцинацијата и пристапот до антивирусни лекови би можеле да го спречат преоптоварувањето на здравствениот систем. Истражувањето сугерира дека ова треба да биде повеќе во фокусот на идниот пристап на владата во борбата против короната во Кина.
Пораката од кинеската влада е дека политиката на нулта ковид ќе го порази омикрон, но здравствените власти велат дека не може да има олеснување на мерките поради недостаток на вакцини. Тие рекоа дека здравствените ресурси се премногу нерамномерно распоредени низ целата земја.
Здравствените експерти и кинеските политички аналитичари се загрижени дека кинеските власти се чини дека немаат излез од политиката на нулта ковид, и не го признаваат неуспехот на таквиот пристап во борбата против вирусот.
Иако бројот на позитивни во Кина се намалува, сè уште е на сила строг карантин. Шангај е во изолација речиси два месеци, а има најголем број позитивни случаи.
