Папата Франциско повика денеска на ставање крај на насилството и екстремизмот, при првата посета на еден папа на Ирак.
Тој патувал на своето прво меѓународно патување од почетокот на пандемијата на коронавирусите, објави ВВС.
Поради коронавирусот и безбедноста, ова е неговата најризична посета досега, но тој инсистираше на тоа дека е негова должност да го стори тоа.
Тој исто така рече дека сè поголемиот број ирачки христијански заедници треба да играат поизразена улога во смисла дека христијанските граѓани имаат целосни права, слободи и одговорности како и сите други.
Околу 10.000 припадници на ирачките безбедносни сили се распоредени на безбедноста на Папата, кој на аеродромот беше пречекан од ирачкиот премиер Мустафа Кадими.
Стотици луѓе стоеја покрај патот од аеродромот, додека папскиот конвој придружуван од мотори се движеше кон градот.
Во говорот откако беше пречекан од ирачкиот претседател Бархам Салих, папата рече дека е многу задоволен што дошол во Ирак, што тој го опиша како лулка на цивилизацијата.
- Оружјето нека замолчи, нека престанат актите на насилство и екстремизам, поделба и нетолеранција!, рече тој.
Папата им се обрати на ирачките христијани, за кои рече дека треба да играат поголема улога во јавниот живот.
Тој рече дека ирачката разновидност е вреден ресурс на кој треба да се потпреме, а не пречка да се отстрани.
Бројот на христијани во Ирак се намали од 1,4 милиони на околу 250 000 во последните две децении, што е помалку од еден процент од населението.
Многу христијани ја напуштија земјата поради насилството по американската инвазија на Ирак во 2003 година, кога беше соборен Садам Хусеин.
Исто така, десетици илјади христијани беа раселени кога џихадистите од Исламска држава го освоија северниот дел на Ирак во 2014 година и ги уништија црквите.
