Исчезна „кралицата“ меѓу гавраните-чувари на лондонската кула по име Мерлина и се претпоставува дека починала, објави Лондонската кула.
Мерлина, која се приклучи на јатото чувари на Лондонската кула во 2007 година, е исчезната неколку недели.
Според некои верувања, Кулата треба да ја чуваат шест гаврани постојано, и ако тие ја напуштат стражата, кралството ќе падне.
Кристофер Скајф, кој е одговорен за грижата за гавраните на Лондонската кула, вели дека ќе жали за Мерлина некое време пред да донесат нова птица во стадото, пренесува Би-Би-Си.
Лондонската кула потврди дека не планираат веднаш да најдат замена за Мерлина.
Се верува дека Чарлс Втори (1630-1685) издал декрет со кој се одлучува Лондонската кула да ја чуваат гаврани.
Во минатиот век, кога останал само еден гавран во стадото, Винстон Черчил наредил да има најмалку шест птици во стадото постојано.
Лондонската кула започна програма за размножување гаврани во 2018 година, откако историската фондација на кралскиот дворец, задолжена за одредени кралски објекти, објави дека станало „исклучително тешко“ да се најдат овие птици во Велика Британија.
