Во Германија веќе подолго време има недостиг на некои видови лекови, особено оние за деца.
Сега министерот за здравство најавува дека овие проблеми ќе се решат.
За почеток, предвидени се временски ограничени мерки.
Празни полици во аптеките каде треба да има средства за намалување на покачената телесна температура кај децата. Очајните родители одат во Холандија да купат лекови за своите болни деца.
Германскиот сојузен министер за здравство Карл Лаутербах поради недостигот на лекови се најде на мета на критики. Сега предложи менување на правилата за одредување на цените на најважните лекови за деца. Според тоа, здравствените осигурителни компании треба да платат и до 50 отсто повеќе од досегашниот максимален пропишан износ. „Ефектите од таа мерка брзо ќе се почувствуваат“, изјави министерот – и предизвика вознемиреност.
Временски ограничено формирање на бесплатна цена
Имено, здружението на правни компании за здравствено осигурување ГКВ веднаш соопшти дека нема јасна правна основа тие да ги сносат зголемените трошоци за лекови за деца. Највисоките суми што ги плаќаат осигурениците за одредени лекови се утврдени во процедурата пропишана со Законот за социјална заштита, што не може да се заобиколи само така, соопштуваат од ГКВ.
Сепак, некакво решение е на повидок. Според информациите на јавниот сервис АРД, од февруари годинава за три месеци треба да се укине ценовната граница за лековите за деца кои содржат ибупрофен и парацетамол, како и за антибиотиците во форма на супозитории или сируп.
Поттик за зголемување на производството?
„Со тоа создаваме претпоставки дека на краток рок ќе дејствуваме против натамошното влошување на тензичната состојба во снабдувањето со лекови за деца“, наведуваат од ГКВ. Ова правило ќе се применува дури од февруари, за аптеките да имаат доволно време да се организираат.
Укинувањето на ценовните ограничувања се однесува на вкупно 180 лекови за деца, меѓу кои сирупи со ибупрофен, супозитории со парацетамол и антибиотици. За фармацевтските компании, ова може да биде поттик за зголемување на испораките, а клиентите би можеле да бидат ослободени од плаќање на партиципација што ја претставува разликата помеѓу износот покриен со здравственото осигурување и вистинската цена на лекот.
Сепак, оваа мерка не е трајно решение. Овозможувањето поголем профит за фармацевтската индустрија не е одржливо, предупредува ККВ и објаснува дека целта е всушност да им се даде време на производителите да ги решат постоечките проблеми во производството и испораката. Оваа постапка е координирана со Сојузното Министерство за здравство, соопштија германските здравствени осигурителни компании, но истовремено нагласија дека очекуваат законски решенија од политиката за да се реши проблемот со испораката во снабдувањето со лекови.
Во иднина нема да има попуст на лековите за деца
Покрај краткорочните ограничени мерки за лековите за деца, во планот на надлежниот министер Лаутербах се предвидува и намалување на притисокот врз цените на лековите на кои им истече патентната заштита. Здравствените осигурителни компании до сега договарале попусти за многу лекови со најповолниот понудувач. За да се спречат проблеми со снабдувањето, во иднина нема да има повеќе попусти на лековите за деца.
Во случај на лекови за возрасни на кои им е истечена патентната заштита, на пример антибиотици и средства за лекување на рак, се предвидува зајакнување на производството на територијата на Европската унија. Затоа, во иднина за вакви лекови повеќе не би морало да се прифаќа најевтината понуда. Наместо тоа, кај важните лекови, покрај понудата на даватели надвор од ЕУ, треба да се земе предвид и понудата на најповолниот производител од една од земјите-членки на ЕУ.
Секако, сето тоа засега се само планови. За да се спроведат, германското Сојузно Министерство за здравство мора да предложи и соодветни закони.
